respira!, Author at ALGUÉN QUE RESPIRA! Festival de Poesía para Corpo Principal

As entradas para ‘A poesía dá a nota’ só se poderán reservar o mesmo día do recital

As entradas para o recital A poesía dá a nota poderanse retirar unicamente o mesmo día do acto, que se celebra o martes 21 de decembro a partir das 20,30 horas no Teatro Principal. Estarán dispoñibles desde as once da mañá na web compostelacultura.gal ou no despacho de billetes da Zona C, situado na Praza de Cervantes. Tamén se poden retirar no despacho do propio teatro desde unha hora antes do recital.

Con A poesía dá a nota clausúrase o martes 21 de decembro no Teatro Principal de Compostela o festival Alguén que respira! 2021. Nesta edición, que se celebrou en catro xornadas desde o 21 de marzo, o respira! organizou un peche festivo con dous artistas de grande forza musical, o galego Projecto Mourente e o asturiano Rodrigo Cuevas, un dos creadores máis carismáticos dos xurdidos nos últimos anos en España. Ambos darán un particular percorrido, respectivamente, pola poesía galega e a asturiana. Será unha descarga de alegría común en medio desta crise individualista na que nos demerxeu a pandemia.

‘A poesía dá a nota’, un peche lúdico para o Alguén que respira! con Rodrigo Cuevas e Projecto Mourente

A poesía dá a nota é o título do recital que clausurará o martes 21 de decembro no Teatro Principal de Compostela o festival Alguén que respira! 2021. Nesta edición, que se celebrou en catro xornadas desde o 21 de marzo, o respira! articulou un peche festivo con dous artistas de grande forza musical, o galego Projecto Mourente e o asturiano Rodrigo Cuevas, unha das personalidades máis carismáticas que se revelaron nos últimos anos en España. Ambos farán, respectivamente, un particular percorrido pola poesía galega e a asturiana. Será unha descarga de alegría común en medio desta crise individualista na que nos demerxeu a pandemia.

Continuar lendo “‘A poesía dá a nota’, un peche lúdico para o Alguén que respira! con Rodrigo Cuevas e Projecto Mourente”

Tres poetas que falan mais alá do papel

No programa de Atravesei a cerca, que se celebra este mércores 22 de setembro, participan artistas de forte personalidade, posuidores dunha obra tan intensa como aprezada, pola crítica e os afeccionados. O galego Sechu Sende recitará os seus poemas ás 19.30 no xardín da Maceta. Javier Peñafiel falará na terraza do centro da Trisca ás 20 horas. E Castillo Suárez estará ás 20.30 no museo ao aire libre de Berto Leis.

Séchu Sende adoita dicir que naceu en Padrón no ano 1972 e que falecerá no Courel en 2074. Escritor, sociolingüista, regueifeiro e profesor, Sende tamén se presenta como domador de pulgas no Galiza Pulgas Circus e activista social. Alén disto, é unha perso- nalidade relevante da poesía galega, aínda que a súa sona popular lle viñese da man da novela Orixe (2004), premio Blanco Amor de novela e polos relatos de Made in Galiza (2009), premio Ánxel Casal e libro do ano. A súa obra, traducida a varias linguas, ecoou no audiovisual, no teatro, na música e en diferentes manifestacións pop, desde camisolas e roupa infantil até tatuaxes ou botes de marmelada do Courel, chuletas para exames e pintadas. Boa parte da súa obra, como a serie Passamontanhas, está nas redes sociais. A Re- pública das Palavras (2015) é o seu último libro en papel.

Javier Peñafiel [Zaragoza, 1964] percorre coa súa creación un camiño que bordea a propia arte, a performance, a poesía e o teatro. Poucos artistas como el optan por unha obra tan porosa e merecen tanto o cualificativo de multimedia. os seus traballos adoitan ser proxectos de longa duración –como egolactante (1997-2007), agencia de intervención en la sentimentalidad (1997- 2001) ou Latido antecedente (2009-2013)– pero tamén produce e edita pezas puntuais ou escribe obras teatrais para vídeo, entre as que destacan Tragedia de las corporaciones. Ignorancia (2000), Voz contraria (2009) e Palacio polifonía (2010). desde 2010, céntrase no que denomina Confedramas, propostas híbridas de voz e texto, onde o vídeo se emprega como dispositivo parateatral.

Castillo Suárez García naceu en Navarra (Altsasu, 1976) e escribe unicamente en éuscaro, idioma no que publicou tanto poemas como literatura infantil, ademais de artigos de opinión e entradas nun blog chamado Iparraldeko neska (a rapaza do país do norte) no que debroca a súa experiencia coa escrita, propia e allea. O seu último poemario, Irautera (2019), foi traducido ao galego por Isaac Xubín, que cualifica este prodixioso libro como un “tratado de botánica do amor”, sobre especies resistentes ou invasoras “que tentan sobrevivir nunha paraxe que é abrupta e boscosa, fermosa e crúa ao mesmo tempo”.

Descobrindo coa poesía novos mapas da cidade de Compostela

Tres espazos case descoñecidos –ou mesmo inéditos– do barrio de San Pedro e tres poetas de voz poderosa. Esa é a proposta de Atravesei a cerca, sección do festival Alguén que respira! que intenta servir de cartografía exploratoria de Compostela. O programa comeza ás 19.30 no xardín da Maceta con Séchu Sende, continúa ás 20 horas na terraza do centro sociocultural da Trisca con Javier Peñafiel e conclúe ás 20.30 no museo ao aire libre do artista forxador Berto Leis, na rúa rúa Pablo Leis, unha calella transversal á Costa do Vedor. As únicas 25 entradas do percorrido estarán dispoñibles para as 25 primeiras persoas que cheguen á Maceta.

O programa do respira! para setebro iniciouse o martes 21 no Teatro Principal co recital O ruído do lume, unha acción poética que se aproximaba á historia recente da poesía galega a través dalgunhas voces que, precisamente, a converteron nun fenómeno internacional. Era unha oportunidade única para sentir nun mesmo espazo a Alba Cid, Andrea Nunes, Miriam Ferradáns, Yolanda Castaño, Elvira Ribeiro Tobío, Eva Veiga, Olga Novo, Chus Pato, Luz Pichel e Luz Fandiño. E a resposta das espectadoras e espectadores resultou masiva. Foi, sen dúbida, un dos grandes acontecementos da historia deste festival que naceu hai catro anos e que en cada edición rexistra un cheo total nas súas actividades.

Para pechar o programa de setembro, co que celebramos o equinoccio de outono, Atravesei a cerca sae ao exterior do Teatro Principal [sede oficial do festival] e lévanos por espazos do barrio de San Pedro. Neste percorrido tan especial descubriremos tres horizontes moi distintos de Compostela. Para moitos, será unha gran sorpresa, non só física senón tamén intesa pola personalidade dos tres artistas que os acompañarán na súa experiencia.

No xardín da Maceta, achegarémonos ás zonas verdes interiores, tan prezadas tradicionalmente nunha cidade abigarrada e de clima cambiante. Logo, iremos á terraza do centro sociocultural da Trisca, a gran atalaia desde a que descubrir a confluencia histórica da capital galega coas montañas que rodean e o val da Amaía ao fondo. Para acabar, o programa trasládanos a un espazo verde de maza, no límite xa da zona histórica compostelá. Pero non é un espazo calquera senón o museo de Berto leis, herdeiro dunha estirpe de forxadores que houbo nesta área –incluíndo a rúa das Fraguas– e que desenvolve desde hai anos en silencio unha obra persoal de evocación surrealista. O seu museo ao aire libre é unha das xoias ocultas do país. Por vez primeira convértese en espazo visitable.

As entradas para ‘O ruído do lume’ pódense sacar desde as once da mañá

Todo está listo para este martes, a partir das 19.30, se levante o pano do Teatro Principal de Compostela e acoller a terceira xornada do festival Alguém que respira! 2021. O ruído do lume [A palabra en combustión de dez poetas galegas] é o título do recital de hoxe, no que participan Olga Novo, Chus Pato, Eva Veiga, Luz Fandiño, Elvira Riveiro, Yolanda Castaño, Andrea Nunes, Luz Pichel, Alba Cid e Miriam Ferradáns. A voz de Ana Romaní será a encargada de introducir o que é, sen dúbida, o acontecemento poético da temporada.

A partir das once da mañá deste día 21 pódense retirar as entradas do recital a través da web compostelacultura.gal, no despacho de billetes da Zona C da praza de Cervantes e no despacho de billetes do propio teatro desde unha hora antes de que comece O ruído do lume.

Para o día 22, está previsto un programa especial co que se celebra o equinoccio do outono baixo o lema Atravesei a cerca, onde lerán os seus poemas Séchu Sende, Castillo Suárez e Javier Peñafiel. A entrada a este programa está restrinxido ás primeiras 25 persoas que cheguen ao xardín da Maceta, onde comezará un percorrido poético por varios espazos singulares do barrio de San Pedro.

Un festival con grande “esixencia de calidade”

O festival Alguén que respira! presentouse onte luns no Concello de Compostela, nun acto no que participaron a concelleira de Acción Cultural, Mercedes Rosón; o secretario xeral de Política Lingüística, Valentín García; e o director do ciclo, Antón Lopo. Menores Mercedes

Mentres Mercedes Rosón salientou o arraigo que o respira! acadou nas súas catro edicións e a dinámica impulsada polo concello para manter a actividade cultural durante a pandemia, Valentín García amosou o seu compromiso cun programa que como o do respira! “se articula sobre unha grande esixencia de calidade”. Pola súa banda, Lopo puxo de relevo a vontade de que o festival se converta, con cada nova edición, nunha referencia como de diversidade e apoio ás minorías. Neste sentido, avanzou que a edición do 2022 terá un espazo específico para a poesía queer, nun momento no que –dixo– asistimos a unha “terrible vaga homófoba”.

O festival comeza este martes día 21, ás 19.30, no Teatro Principal co recital O ruído do lume e. Nel participan, Olga Novo, Chus Pato, Eva Veiga, Luz Fandiño, Elvira Riveiro, Yolanda Castaño, Andrea Nunes, Luz Pichel, Alba Cid e Miriam Ferradáns.

O mércores 22 continúa –tamén a partir das 19.30– con Atravesei a cerca, que se celebra en tres espazos singulares do barrio de San Pedro: o xardín da Maceta, a terraza do centro socicultural da Trisca e no museo ao aire libre do ferreiro Berto Leis. Neses espazos lerán os seus poemas o galego Sechu Sende, o aragonés Javier Peñafiel e a navarra Castillo Suárez.

Tres poemas inéditos de Elvira Ribeiro Tobío, Eva Veiga e Andrea Nunes Brións

“e se agora fose / o momento de acuñar a moeda / dun tempo futuro / e non houbera nada capaz de imprimir / un trazo de inocencia un átomo / de espada felicidade / para que boca fermentamos / a dolorosa uva para que vento / prememos coas nosas mans o sol?“. Estes versos escribiuno Eva Veiga e aparecen no libro do festival Alguén que respira!, que terá lugar en Compostela os dçias 21 e 22 de setembro. Os versos forman parte das prezadas achegas inéditas que ofrece o libro, como as de Elvira Ribeiro ou Andrea Nunes.

Eva Veiga (ombre, Pontedeume, 1961) é unha das poetas que conseguiu construir non só un proxecto literario senón tamén unha voz poética en acción. Xunto aos músicos Fito ares e Bernardo Martínez e o pintor Alfonso Costa forma parte do grupo Ouriol, co que realiza recitais e espectáculos multidisciplinares dende o ano 2000. Asemade, como actriz, intervén nos filmes A cicatriz branca e Nación da directora Margarita Ledo. Entre os seus poemarios figuran Fuxidíos (1993) e A distancia do tambor (2014). No ano 2020, publicou con Baldo Ramos Quérote canto, polo que recibiron o Losada Diéguez á creación literaria.

Elvira Ribeiro Tobío (Cunchido, Cerponzóns, 1971) asomouse á poesía galega ao raiar o século XXI e desde entón sigue fiel á súa vocación de axitadora de conciencias e de corpos. En 2005 publicou o seu primeiro libro individual, Andar ao leu, a partir do cal desenvolveu unha traxectoria interdisciplinar e apaixonada, con títulos como Arxilosa (2005), Palabras brancas (2008), Biografía da Multitude (xunto con Silvia Penas, 2009), carnia haikai (2012), corpos transitivos (2013), As redes de Inés (2014), Maruja Mallo (2017), Welcome to Sing Sing (2017), Ola!, son un bicho bóla! (2019) ou Mar de mazá (2020).

Andrea Nunes Brións (Marín, 1984) constrúe unha poesía vinculada ao activismo feminista, cunha clara aposta pola diversidade sexual e corporal. Asegura que cada vez se sente máis consciente dos seus privilexios como persoa cis, euro-branca e continúa –engane– “descolonizando” o seu pensamento e as súas relacións. Corrente de esquecemento (2007) foi o seu primeiro libro, ao que seguiu Todas as mulleres que fun, un dos grandes éxitos editoriais do ano 2011. O seu último poemario, Diáspora do amor balea, escrito canda María Rosendo, gañou o XII Premio de Poesía Erótica Illas Sisargas no 2017.

Un adianto no libro do festival da poesía que está a escribir Olga Novo

Como en cada edición, o festival Alguén que respira! publicará un libro coas biografías e poemas das persoas convidadas, deseñado como é habitual por Manuel Martínez. Este ano, unha das maiores achegas faina Olga Novo, que introduziu no libro un dos seus máis recentes poemas, inédito e vibrante como o é boa parte da sua obra. O texto serve de adianto á que será a nova obra da poeta. Olga Novo (Vilarmao, Pobra do Brollón, 1975) é unha presenza de grande impacto na poesía e no imaxinario literario galego. Filla de labregos, poeta, ensaísta, tradutora e crítica literaria, exerce a docencia no ensino secundario. O vitalismo, a utopía, a liberación feminista, o revolucionario poder cognoscitivo da poesía, o seu carácter visionario e radical, a autenticidade da escritura, a memoria rural e a pulsión telúrica son temas queridos á autora, tanto na súa poesía coma no ensaio. Publicou como poeta A teta sobre o sol (1996), Nós nus (premio losada diéguez, 1997), A cousa ver- mella (2004), Cráter (Premio da Crítica española, 2011) e Feliz Idade (Premio da Crítica galega, da Crítica española e Nacional de poesía). Traducida a diversas linguas, en castelán viron a luz a antoloxía persoal Los líquidos íntimos (2012) e Felizidad (2020).

O esperado recital de Chus Pato

Entre as poetas que participan o día 21 en O ruído do lume, sen dúbida Chus Pato (Ourense, 1955) é unha das mais esperadas. Para o respira! preparou un recital moi especial, que sorprenderá á asistencia. Entre 1991 e 2019, Chus Pato publicou once poemarios, entre eles m-Talá (2000), considerado un libro fundamental na renovación discursiva do seu tempo. A súa audaz obra foi traducida a varios idiomas e recollida en decenas de antoloxías nacionais e internacionais. É a primeira poeta galega convidada a deixar a súa voz gravada na Woodberry Poetry Room da Universidade de Harvard. Recentemente publicou en castelán a súa Poesía reunida (voluménes I-II) e acaba de aparecer a edición crítica de m-Talá da man de Carlos Lema. O seu último poemario (2019) leva por título Un libre favor.

Cen anos de poesía galega e dez poetas para celebrar o equinoccio de outono

Un século de poesía galega e dez poetas que cruzan o século desde o fío da II República. Ese é o escenario de O ruído do lume, acción poética que o martes día 21 se celebra no Teatro Principal de Compostela dentro do programa do festival Alguén que respira! para setembro. A acción propón descubrir a poesía galega recente a través dalgunhas voces que, precisamente, a converteron nun fenómeno internacional. Poucas oportunidades hai na vida de sentir nun mesmo espazo a Alba Cid, Andrea Nunes, Miriam Ferradáns, Yolanda Castaño, Elvira Ribeiro Tobío, Eva Veiga, Olga Novo, Chus Pato, Luz Pichel e Luz Fandiño. Ademais delas, estará a voz da poeta Ana Romaní, que fará a introdución do acto. O programa preséntase este luns, 20 de setembro, nunha roda de prensa na Casa do Concello de Santiago ás 10.30 horas. No acto participan a concelleira de Acción Cultural. Mercedes Rosón, o secretario xeral de Política Lingüística, Valentín García, e o director do festival, Antón Lopo.

Para esta terceira entrega do respira!, organizáronse dúas xornadas, os días 21 e 22, con dúas accións poética de estéticas moi marcadas. O ruído do lume [A palabra en combustión de dez poetas galegas] é o título do recital que acollerá o Teatro Principal o día 21 a partir das 19,30. Sobre o escenario, algunhas da voces que protagonizaron os procesos internos de axitación política e cultural . Pero tamén a progresiva internacionalización da nosa poesía. Unhas naceron na II República e outras co primeiro triunfo electoral de Manuel Fraga Iribarne. Unhas loitaron na clandestinidade, outras combateron a ditadura ou concorriron en listas electorais independentistas. Foron de raíz anarquistas, do combate identitario, de esculca performática e, mesmo, manteñen o finísimo fío sanguíneo con Rosalía de Castro. Pero todas, absolutamente todas, respiran.

As entradas para asistir están dispoñibles só o mesmo día do recital. Non hai posibilidade de reservas previas. Poderán retirarse as entradas na Sala C da Praza de Cervantes, na web compostelacultura.gal ou na billtería do propio Teatro Principal desde as 18,30.

Atravesei a cerca

O día 22 de setembro, mércores, terá lugar a segunda xornada do programa de setembro, co título Atravesei a cerca. Habitualmente, esta sección esculcaba os espazos ocultos do Teatro Principal, sede do festival. Pero nesta ocasión, decidimos saír do edificio e difundir recantos pouco coñecidos da cidade. O percorrido comezará no xardín do restaurante A Maceta, ás 19.30 cos versos de Séchu Sende. Prosigue na terraza do centro sociocultural da Trisca co performer e activista aragonés Javier Peñafiel. E conclúe, ás 20.30 horas, co recital da poeta navarra Castillo Suárez no museo de Berto Leis da rúa Pablo Leis, unha escondida calella que parte da Costa do Vedor. As 25 prazas de aforo para asistir a Atravesei a cerca distribuiranse por orde de chegada ao xardín da Maceta ás 19.30.

Continuar lendo “Cen anos de poesía galega e dez poetas para celebrar o equinoccio de outono”

As entradas do Alguén que Respira! só estarán dispoñibles o mesmo día do recital

Todo está preparado para a terceira entrega do festival Alguén que respira!, organizado polo Concello de Santiago para os días 21 e 22 de setembro. Nesas dúas jornadas non só teremos oportunidade de ver e escoitar a algunhas das poetas galegas máis escitilantes dos últimos anos no Teatro Principal, senón que tamén visitaremos tres espazos case descoñecidos da cidade para presenciar as propostas de Séchu Sende, Castillo Suárez e Javier Peñafiel.

O ruído do lume [A palabra en combustión de dez poetas galegas] é o título do recital que acollerá o Teatro Principal o día 21 a partir das 19,30. As entradas para este encontro interxeracional de poetas como Luz Fandiño, Yolanda Castaño, Chus Pato ou Olga Novo poderán sacarse unicamente o mesmo día do recital, sen posibilidade de facer reservas previas. Todas as persoas interesadas en asistir deberán retirar as entradas na Sala C da Praza de Cervantes [de 11 a 14 horas e a partir das 16. Teléfono 981 542 462], retelas a través da web compostelacultura.gal ou retiralas na billtería do propio Teatro Principal desde as 18,30. As entradas son gratuitas.

O ruído do lume reunirá a boa parte das mulleres que nestes últimos anos protagonizaron un novo renacer da poesía galega. A súa forza e personalidade non só marcaron as crónicas literarias en Galicia senón que tamén se converteron en referentes peninsulares e en admiradas poetas internacionais. Ademais das poetas mentadas, o recital conta coa participación de Alba Cid, Luz Pichel, Elvira Ribeiro, Miriam Ferradáns, Eva Veiga e Andrea Nunes Brións. Trátase dun auténtico acontecemento que porá no escenario o fío interxeracional máis prodixioso da literatura galega.

Para a segunda xornada, a do día 22, o festival recupera a sección Atravesei a cerca, que esta vez sobarda o edificio do Principal para eculcar espazos inéditos ou case descoñecidos da cidade. Os recitais da sección, que tamén son gratuítos, celebraranse sucesivamente no xardín do restaurante A Maceta, na terraza do centro sociocultural da Trisca e no museo ao aire libre de Berto Leis, un ferreiro que creou unha sorprendente paisaxe nas hortas próximas á Costa do Vedor.

A organización decidiu para este programa que as 25 prazas de aforo se distribuísen por orde de chegada á xardín da Maceta, onde comezará o percorrido do recital ás 19,30 horas cos versos de Séchu Sende. O prograna continúa ás 20 horas na Trisca co performer e activista aragonés Javier Peñafiel. Por último, ás 20,30, a poeta vasca Castillo Suárez lerá os seus poemas no museo de Berto Leis.

Estamos xa na cuarta edición do festival, neste 2021 articulado de maneira excepcional ao longo do ano en carro programas, coincidindo sempre nos días 21 de solsticios e equinoccións. O pasado 21 de marzo –Día Mundial da Poesía– o festival inaugurouse con manifesto de Manuel Rivas e un recital titulado + ou – 21 [anos], en referencia á idade media dos poetas que integran o programa, e contou coas voces de Iago González, Belén Senín, Maria Bras, Martin Bidaur, María Isern e Mario Obrero.

Xa no solsticio de primavera, o 21 de xuño, celebrouse a segunda entrega do festival cunha sesión de regueifas polas rúas da cidade con Manuel Maseda, Lupe Blanco, Josinho da Teixeira e Xurxo Souto. Ese mesmo día, no Teatro Principal, Miguel Azguime representou a súa performance Itinerario do sal.

A explosión da voz das mulleres protagoniza o Alguén que respira! de setembro

O festival Alguén que respira!, organizado polo Concello de Santiago, celebra a súa terceira entrega do ano os días 21 e 22 de setembro con dous recitais de grande impacto. Neles, non soamentes poderemos ver e escoitar no Teatro Principal a algunhas das poetas máis escitilantes dos últimos anos en Galicia senón que tamén visitaremos tres espazos singulares da cidade para presenciar as propostas menos convencionais de tres creadores: Séchu Sende, Castillo Suárez e Javier Peñafiel.

O recital do día 21 xa é, de antemán, histórico. Co título O ruído do lume [A palabra en combustión de dez poetas galegas], o Principal reunirá a boa parte das mulleres que nestes últimos anos protagonizaron un novo renacer da poesía galega. A súa forza e personalidade non só marcaron as crónicas literarias en Galicia senón que tamén se converteron en referentes peninsulares e en admiradas poetas internacionais. Proba desa explosión son os premios nacionais que recibiron nos últimos anos Pilar Pallarés, Olga Novo ou Alba Cid, estas duas últimas presentes no recital do día 21. Canda elas estarán Yolanda Castaño, Luz Pichel, Elvira Ribeiro, Miriam Ferradáns, Eva Veiga, Luz Fandiño, Andrea Nunes e Chus Pato. Trátase dun auténtico acontecemento que porá no escenario o fío interxeracional máis prodixioso da literatura galega.

Para a segunda xornada, a do día 22, o festival recupera a sección Atravesei a cerca, que o ano pasado non puido celebrarse polas limitacións do protocolo sanitario. E como agora tamén habería problemas para articulalo no Teatro Principal, a organización decidiu levalo a espazos exteriores, aínda mantendo as limitacións de aforo. Deste xeito, os afeccionados terán oportunidade de visitar espazos que de maneira habitual non están abertos ao público, como o museo ao aire libre de Berto Leis, un ferreiro que creou unha sorprendente paisaxe nas hortas da Costa do Vedor. Completan os escenarios do recital a terraza do restaurante A Maceta na rúa de San Pedro e a sorprendente terraza do centro sociocultural da Trisca, na Corredoira das Fraguas.

O percorrido comeza ás 19,30 horas na Maceta cos versos de Séchu Sende e continúa ás 20 horas na Trisca co performer e activista aragonés Javier Peñafiel. Por último, ás 20,30, a poeta vasca Castillo Suárez lerá os seus poemas no museo de Berto Leis.

Nesta cuarta edición, o Alguén que respira! celébrase ao longo do ano en catro programas, coincidindo sempre nos días 21 de solsticios e equinoccios. O pasado 21 de marzo –Día Mundial da Poesía– o festival inaugurouse co manifesto de Manuel Rivas e un recital titulado + ou – 21 [anos], en referencia á idade media dos poetas que integran o programa, e contou coas voces de Iago González, Belén Senín, Maria Bras, Martin Bidaur, María Isern e Mario Obrero. No 21 de xuño, foi a quenda do músico e performer portugués Miguel Azguime, ademais da sesión de regueifa con Manuel Maseda, Lupe Blanco, Josinho da Teixeira e Xurxo Souto. O festival do 2021 clausurarase o próximo 21 de decembro, tras un ano de actividade.

O festival

O festival Alguén que respira! é unha iniciativa da Concellería de Acción Cultural do Concello de Santiago de Compostela para apoiar a poesía en todas as súas expresións. O concello conta co apoio da Secretaría Xeral de Política Lingüística da Xunta de Galicia. O equipo de realización fórmano Antón Lopo na dirección; Cecilia Carballido na produción; Manuel Martínez no deseño gráfico; Baltasar Patiño na iluminación e escenografía; Alexandre Fernández Peón en comunicación e Iris Cochón na coordinación literaria.

Regueifa para intervir nas rúas

A regueifa de Lupe Blanco, Xurxo Souto, Manolo Maseda e Josinho da Teixeira converteron as rúas de Compostela no escenario da máis xenuína arte poética da cultura popular galega, programada polo festival Alguén que respira!. Foi unha hora durante a que o enxeño, a habelencia, a retranca, a incisiva ollada política e o humor serviron de complicidade entre os regueifeiros e os paseantes que atoparon en prazas como Praterías ou o Toural un espectáculo inesperado. A regueifa é unha das pezas xa clásicas no festival, que aposta tanto polas formas vangardistas da poesía como polas tradicionais. As próximas xornadas do Respira! terán lugar o 21 de setembro e o 21 de dezembro. Para non perdelo!

A forza desconcertante de Miguel Azguime pechou a segunda xornada do festival

A escintilante proposta de Miguel Azguime en Itinerario do sal encheu onte o Teatro Principal de Compostela de atmosferas inquietantes e vibrantes, dúas palabras que definen perfectamente a ópera vangardista do compositor e performer portugués. Foi unha hora na que o despregamento técnico e a forza escénica de Azguime impactaron nos espetadores ata convertesse nunca das grandes sorpresas da temporada en Galicia. El fechou a segunda xornada do festival, organizado pola Concellería de Acción Cultural da cidade. A terceira e cuarta xornada terán lugar os días 21 de setembro e 21 de decembro, coincidindo co equinoccio de outono e o solsticio de inverno.

Poesía popular e ópera de vangarda para un luns de solsticio no ‘Alguén que respira!’

Todo está listo para que a poesía sexa a protagonista en Compostela do solsticio de verán, cun programa que reúne a proposta popular da regueifa e a ópera vangardista Salt itinerary de Miguel Azguime. Estamos ante o festival Alguén que respira!, que celebra este luns 21 de xuño a súa segunda xornada, dentro dun programa deslizante ao longo do ano vinculado a equinoccios e solsticios. Os próximos encontros serán o 21 de setembro e o 21 de decembro.

A xornada comezará ás sete da tarde cos regueifeiros e unha proposta singular de itinerancia polas rúas da cidade. O espectáculo, segundo as previsións, estará pasado pola choiva e por iso a organización do festival preparou cos regueifeiros unha sorpresa especial como antídoto contra os chuzos de punta. Manuel Maseda, a quen o Respira! lle encargou articular a sección, dispuxo dúas parellas que ás 19 horas partirán de dúas prazas, Praterías e Toural. No seu percorrido irán improvisando as súas regueifas ata encontrarse fronte ao Teatro Principal, onde proseguirán xuntos o seu diálogo cantado e xa con instrumentos. Xurxo Souto, Lupe Blanco e Josinho da Teixeira acompañarán a Manuel Maseda. O acceso é libre.

Desde a súa primeira edición, o festival dedicou unha especial atención ao fenómeno da poesía oral popular, non só á galega senón tamén á vasca e catalá. Porén, esta é a primeira ocasión na que tanto o festival como a regueifa sae do recinto do teatro –sede do Respira!– para buscar a complicidade das rúas.

A segunda proposta do programa será ás 20,30 no Principal, que acollerá un dos espectáculos máis esperados da temporada en Galicia, a estrea de Salt itinerary, unha ópera de vangarda creada polo compositor, poeta e performer Miguel Azguime. As entradas pódense reservar a través da web compostelacultura.gal ou na Zona C. Punto de Información Cultural, na Praza de cervantes, que está aberto este domingo de 11 a 14 horas. Tamén se poden retirar na billtería do propio teatro unha hora antes de que comece o espectáculo.

Salt itinerary é unha ópera multimedia onde Azguime refexiona sobre a creación e a loucura. O seu eixo é a linguaxe –como adoita suceder no traballo deste inquiteante artista–, a palabra-sentido e a palabra-son, ambas tratadas como dimensións da voz en canto extensión do corpo e totalmente integradas na construción escénica como proxección tanxíbel da resonancia das palabras. Audio, vídeo e procesos electrónicos en tempo real asociados á proxección espacial da voz, da poesía, do xesto, da música e do trazo, concibidos para desenvolver unha polifonía de sentidos, un contrapunto de significados e mais unha exuberancia de emocións.

Azguime está acompañado por Paula Azguime [staging & video creation; proxección de son e live-electronics], Presea Mamdillo e André Bartetzki [videoprogramación]. A proposta ten desenvolvemento técnico de Miso Studio.

Xa se poden reservar entradas para ‘Salt itinerary’ de Miguel Azguime

Desde este xoves [17 de xuño] xa podes reservar as entradas para un dos programas máis esperados da temporada, a proposta de Miguel Azguime no Alguén que respira!, que se celebra en Compostela ao longo do ano. A segunda xornada ten lugar, precisamente, este luns día 21 de xuño, coincidindo co solsticio de verán. O día máis longo do ano levará, así, o selo deste festival de poesía que se iniciou o 21 de marzo e que se prolongorá con programas específicos o 21 de setembro e o 21 de decembro.

As entradas para ver Azguime coa súa impactante ópera Salt itinerary pódense reservar a través da web compostelacultura.gal ou na Zona C. Punto de Información Cultural, na Praza de Cervantes, que está aberto de martes a sábado, de 11 a 14 e de 16 a 19 h. Os domingos de 11 a 14 horas. Con todo, desde o Concello de Compostela, que organiza o festival, recoméndase o uso da web.

Aínda que a proposta de Azguime ten aforo limitado, o programa conta cun espectáculo de acceso libre: as regueifas que protagonizan Xurxo Souto, Lupe Blanco, Josinho da Teixeira e Manolo Maseda a partir das 19 horas. Formarán dúas parellas que sairán de dúas prazas da cidade [Praterías e Toural] e virán reunirse diante do Principal, onde farán unha sesión conxunta xa con instrumentos musicais. E como, en principio está prevista chuvia, os regueifeiros téñennos preparada unha sorpresa vinculada coa posta en escena.

O respira! acolle este ano a un dos artistas portugueses máis admirados das ultimas décadas, Miguel Azguime, que estrea en Galicia Sal itinerary, unha refexión sobre a creación e a loucura. Trátase dunha ópera multimedia que xira arredor da linguaxe, da palabra-sentido e da palabra-son, ambas tratadas como dimensións da voz en canto extensión do corpo e totalmente integradas na construción escénica como proxección tanxíbel da resonancia das palabras. Audio, vídeo e procesos electrónicos en tempo real asociados á proxección espacial da voz, da poesía, do xesto, da música e do trazo, concibidos para desenvolver unha polifonía de sentidos, un contrapunto de significados e mais unha exuberancia de emocións.

Azguime está aocmpañado por Paula Azguime [staging & video creation; proxección de son e live-electronics],Presea Mamdillo e André Bartetzki [videoprogramación]. A proposta ten desenvolvemento técnico de Miso Studio.

Dúas rutas de regueifas para o 21: desde o Toural e Praterías ata o Teatro Principal

A nova xornada do festival Alguén que respira!, que se desenvolverá o vindeiro luns 21 de xuño, terá dous grandes protagonistas, a ópera Salt itinerary de Miguel Azguime [que se representa no Teatro Principal a partir das 20,30 horas] e unha sesión de regueifas polas prazas da cidade. Aínda que para asistir á ópera de Azguime, un dos máis poderosos performers portugueses dos últimos anos, será preciso reservar entradas, a asistencia á sesión de regueifas é en aberto.

Serán dúas parellas de regueifeiros que sairán de dúas prazas da cidade, Praterías e O Toural a partir das 19 horas. Desde esas prazas, farán un percorrido que irá tentando atrer un grupo de asistentes para a confluencia dos catro regueifeiros no Teatro Principal, que será onde conclúa o percorrido. Nesa última regueifa, ademais, utilizarán distintos instrumentos. Os catro regueifeiros que participan no festival son Manuel Maseda, Lupe Blanco, Josinho da Teixeira e Xurxo Souto.

No caso de que a tarde sexa de chuvia, organizouse unha sesión alternativa en diferentes espazos do propio Teatro Principal.

Desde a súa primeira edición, o Alguén que respira! fixo unha aposta clara pola oralidade e o fenómeno da regueifa. Ademais de abrirlle un espazo propio na programación, o festival incluiu espectáculos de versificadores doutras latitudes e idiomas, como os bertsolaris vascos.

O Principal celebra o solsticio de verán coa vangarda portuguesa de Miguel Azguime

Alguén que respira! acolle este ano a un dos artistas portugueses máis inquietantes das ultimas décadas, o compositor, poeta e performer Miguel Azguime, que estrea en Galicia sal itinerary, un dos seus espectáculos máis celebrados, unha refexión sobre a creación e a loucura. Trátase dunha ópera multimedia que xira arredor da linguaxe, da palabra-sentido e da palabra-son, ambas tratadas como dimensións da voz en canto extensión do corpo e totalmente integradas na construción escénica como proxección tanxíbel da resonancia das palabras. Audio, vídeo e procesos electrónicos en tempo real asociados á proxección espacial da voz, da poesía, do xesto, da música e do trazo, concibidos para desenvolver unha polifonía de sentidos, un contrapunto de significados e mais unha exuberancia de emocións.

Azguime –que actúa este 21 de xuño no Teatro Principal de Compostela a partir das 20,30 horas– está acompañado por Paula Azguime [staging & video creation; proxección de son e live-electronics],Presea Mamdillo e André Bartetzki [videoprogramación]. A proposta ten desenvolvemento técnico de Miso Studio.

Regueifa para celebrar a poesía no día más longo do ano co festival Alguén que respira!

O tránsito popular das rúas de Compostela e o Teatro Principal –un dos primeiros espazos de exhibición con propiedade pública que houbo no país– únense este luns día 21 de xuño para celebrar o solsticio de verán co festival Alguén que respira!, o gran acontecemento poético que cada ano se celebra en Galicia. Nas rúas será onde comece, a media tarde, o programa de regueifas, onde participan Manuel Maseda, Lupe Blanco, Josinho da Teixeira e Xurxo Souto, catro dos máis celebrados representantes do xénero ao que lle tributa homenaxe o festival como recoñecemento na súa contribución á poesía oral galega. Os regueifeiros, por parellas, farán un percorrido por catro prazas da cidade ata reunirse diante do Teatro Principal pouco antes de que comece a actuación [20,30 horas] do poeta e performer portugués Miguel Azguime.

Nesta cuarta edición, o festival celébrase ao longo do ano en catro programas, coincidindo sempre nos días 21 de solsticios e equinoccións. O pasado 21 de marzo –Día Mundial da Poesía– o festival inaugurouse cun recital titulado + ou – 21 [anos], en referencia á idade media dos poetas que integran o programa, e contou coas voces de Iago González, Belén Senín, Maria Bras, Martin Bidaur, María Isern e Mario Obrero. Os días 21 de setembro e 21 de decembro terán lugar os próximos programas, que se articularán de acordo cos protocolos sanitarios de cada momento segundo o estadio do covid-19.

Lara Rozados é a autora da unidade didáctica do festival para os institutos

A web do festival ofrece na lapela Unidade Didáctica un material preparado por Lara Rozados para celebrar las aulas o festival e exercitar as capacidades do alumnado na poesía oral. A poesía como arte de acción, mobilizadora, transformadora, poderosa, en diálogo coas artes e co coñecemento, cos teatros, cos bares e coa rúa, coa música, coa performance, co papel impreso e coa oralidade. O 21 de marzo foi escollido como Día Mundial da Poesía pola UNESCO, no ano 1999. O festival creouse hai catro anos. Nas tres edicións precedentes realizaron o manifestó da xornada María Xosé Queizan, Xosé Luís Méndez Ferrín e Luz Pozo Garza. Este ano o encargado é Manuel Rivas.