ALGUÉN QUE RESPIRA! Festival de Poesía para Corpo Principal

O I Certame de Poesía Respira! xa ten gañadores: Daniela Rial Estévez do CPI de Cova Terreña en Baiona; Xurxo González Rodríguez do IES Río Cabe de Monforte de Lemos; Amalia Blanco Pose do IES Terra do Xallas de Santa Comba e Daniel Souto Pazó do ETSE da Universidade de Santiago de Compostela. O premio convocouse, dentro do festival Alguén que respira!, co obxectivo de fomentar a poesía no impulso das ideas e facer do galego un idioma de intercambio cultural. Está organizado polo Concello de Santiago de Compostela co apoio da Secretaria Xeral de Política Lingüística da Xunta de Galicia.

 O galardón está dividido en catro apartados: Educación Primaria, cunha dotación de 200€, E.S.O. con 300€, Bacharelato e ciclos formativos de 1º grao con 400€ e, finalmente, Universidade e ciclos formativos de 2º grao con 600€.

Os gañadres lerán os seus poemas en Compostela, no recital colectivo o 21 de marzo, Día Mundial da Poesía. O tema central desta primeira edición foi a ecoposía como ferramenta contra o cambio climático.

Daniela Rial Estévez naceu en 2012 e estuda 5º de Primaria no CPI de Cova Terreña en Baiona. O seu poema leva por título A terra chora.  Xurxo González Rodríguez, pola súa banda, estuda cuarto de ESO no IES Río Cabe de Monforte de Lemos e presentou o poema Spes. Amalia Blanco Pose cursa 1º de Bacharelato no IES Terra do Xallas de Santa Comba e gañou o apartado con Dun mirar de cor verde cremado. Por último, Daniel Souto Pazó estuda Segundo de Enxeñería Informática na ETSE de Santiago de Compostela e o seu poema titúlase Escarnio.

O xurado do certame estivo formado por Iris Cochón, Anxos Sumai e Soedade Noia, coordinadora do premio xunto a Antón Lopo, director do festival Respira!. Os poemas gañadores aparecerán no volume 22 ecopoemas contra o cambio climático, que se distribuirá no festival e no que tamén figuran textos de Margarita Ledo, Ismael Ramos, Helena Villar, Arancha Nogueira, Roberto Abuín, Ramón Blanco, Tino de Féliz, Xabier Cordal, Genaro da Silva, Tamara Andrés, Antía Otero, Miro Villar, Rebeca Baceiredo, Iago González, Manuel Rivas, Xavier Rodríguez Baixeras, Olalla Cociña e Clo Plas.

---

 

 Amorante

O festival Alguén que respira!, o grande acontemento poético do ano en Galicia, apura os últimos preparativos antes de erguer o pano do Teatro Principal de Compostela, sede central dun encontro que se inaugura o sábado 18 de marzo ás 20 horas e que se prolonga ata o martes 21, Día Mundial da Poesía. Dous días antes, o xoves 16, o programa será presentado nunha roda de prensa pola concelleira de Acción Cultural de Santiago, Mercedes Rosón –que organiza o encontro– e o secretario xeral de Política Lingüística da Xunta, Valentín García, que apoia o festival desde a súa primeira edición. Canda eles, estará o director do respira!, Antón Lopo. Toda a información e os detalles do programa están dispoñibles na web alguenquerespira.gal.

 Jansky

As entradas para o festival saen o mércores día 15 de marzo na web compostelacultura.gal e tamén se poderán retirar desde ese mesmo dia no despacho de billetes da Zona C. Punto de Información Cultural de 11 a 14 e de 16 a 19 h. (teléfono 981 542 462). Por último, o despacho de billetes do Teatro Principal estará aberto desde unha hora antes do comezo dos recitais (teléfono 981 571 026).

 María Grandío

O tema central da edición é a ecoposía como ferramenta para loitar contra o cambio climático e nesa aposta, inclúese a publicación dun volume con 22 ecopoemas realizados expresamente para o encontro. Nel aparecerán, así mesmo, os catro poemas gañadores do I Certame de Poesía Respira! para estudantes.

O programa resulta tan irresistible pola diversidade (e calidade) das propostas como polos contidos, coa poesía como elemento aglutinante e reflexivo. Nel figuran Amorante, Jorge Riechmann, María Grandío, Rosa Berbel, Jansky, Keith Payne, Ismael Ramos, Miro Villar, Antonio Orihuela, Margarita Ledo Andión, Versofonía, Tino de Féliz, Joseba Sarrionandía, Isaac Xubín, Ruper Ordorika, Helena Villar, Claudio Rodríguez Fer,  Antía Otero, Xabier Cordal, Arancha Nogueira, Olalla Cociña, Manuel Rivas, Iago González, Ramón Blanco+Pablo Sax, Rebeca Baceiredo, Rafael Rodriguz Baixeras, Tamara Andrés, Carlos Solla, Genaro da Silva ou Clo Plas.

---

 

Está todo listo para que o próximo sábado 18 de marzo dea comezo no Teatro Principal de Santiago de Compostela a sexta edición do Alguén que respira!, o grande acontemento poético do ano. Serán catro dias cun programa engaiolante articulado, nesta ocasión, arredor do lema Ecopoesía contra o cambio climático, o cal o converte no encontro máis importante que se celebrou nunca en Galicia sobre ecopoesía. Entre as propostas que poderemos sentir ata o 21 de marzo –Día Mundial da Poesía– figuran Amorante, Jorge Riechmann, María Grandío, Rosa Berbel, Jansky, Keith Payne, Ismael Ramos, Miro Villar, Antonio Orihuela, Margarita Ledo Andión, Versofonía, Tino de Féliz, Joseba Sarrionandía, Isaac Xubín, Ruper Ordorika, Helena Villar, Claudio Rodríguez Fer,  Antía Otero, Xabier Cordal, Arancha Nogueira, Olalla Cociña, Manuel Rivas, Iago González, Ramón Blanco+Pablo Sax, Rebeca Baceiredo, Rafael Rodriguz Baixeras, Tamara Andrés, Carlos Solla, Genaro da Silva ou Clo Plas. O programa resulta tan irresistible pola diversidade (e calidade) das propostas como polos contidos, coa poesía como elemento aglutinante e reflexivo.

O festival Alguén que respira! é unha iniciativa da Concellería de Acción Cultural do Concello de Santiago de Compostela para apoiar a poesía en todas as súas expresións. O concello conta coa colaboración da Secretaría Xeral de Política Lingüística da Xunta de Galicia. O equipo de realización fórmano Antón Lopo na dirección; Cecilia Carballido na produción; Manuel Martínez no deseño gráfico; Baltasar Patiño na iluminación e escenografía; Alexandre Fernández Peón en comunicación, Iris Cochón na coordinación literaria; Soedade Noia na coordinacion do Premio respira! e Anxos Sumai na revisión lingüística do volume que cada ano se publica con textos e biografías de cada poeta que participa no festival.

---

 

Con motivo da VI edición do Festival Alguén que respira,  impulsouse a I edición do Certame Respira!, dirixido a fomentar a poesía como impulso das ideas e que tamén ten como obxectivo facer do galego un idioma de intercambio cultural. Ao certame, organizado ao igual que o festival polo Concello de Santiago de Compostela co apoio da Secretaria Xeral de Política Lingüístic,  presentáronse preto de cen traballos, todos eles centrados no tema do Cambio de Clima e os legados culturais da vida, eixo desta edición do festival.

O certame divídese en catro categorías: Educación Primaria, E.S.O., Bacharelato e Ciclos formativos de 1º grado e Universidade e Ciclos formativos de 2º grado. Cada unha das categorías conta coa súa correspondente dotación. Educación Primaria: un premio de 200 €. E.S.O. un premio de 300 €. Bacharelato e Ciclos formativos de 1º grado: un premio de 400 €. Universidade e Ciclos formativos de 2º grado: un premio de 600 €.

O xurado estivo composto por Iris Cochón, Anxos Sumai e Soedade Noia, encargada de coordinar o certame punto ao director do festival, Antón Lopo. Esta mesma semana farines públicos os nomes dos gañadores.

---

 

A poesía de Ana Romaní, a de Francisco Cortegoso, Lorena Souto, Carlos Callón ou Lois Pereiro son algunhas da inspiracións para o recital que este sábado día 20 de marzo, a partir das 21,30 horas, presenta no festival Alguén que respira! o heterodoxo Projecto Mourente [alcume baixo que traballa Carlos Valcárcel]. O recital  é un encargo do propio festival que el desenvolve na fusión de ritmos e latitudes onde non faltan o beats discotequeiros e que lle dan sempre aos traballos de Mourente o seu particular selo. Carlos Valcárcel é profesor e investigador na Universidade de Vigo. Desenvolve a maior parte do seu labor na Facultade de Educación do campus de Pontevedra, onde ensina didáctica das linguas segundas e estranxeiras. Nos últimos anos, Valcárcel participou en proxectos de moi diverso tipo, desde a xeración automática de texto até a cooperación con Latinoamérica para fomentar o traballo colaborativo, pasando pola elaboración de diccionarios electrónicos multilingües.

Continuar lendo “Projecto Mourente inspírase na poesía de Cortegoso, Ana Romaní, Lois Pereiro, Lorena Souto e Carlos Callón”

Alberto Mira, que abre os cafés de reflexión no ambigú do Teatro Principal o sábado día 19, a partir das doce do mediodía, centrarase sobre algúns temas de Crónica dun devir, un ensaio no que reflexiona sobre o “nós”  queer a partir da súa relación vital. Un “nós” queer, gai, LGTBI, ademais do seu “feito social”, sempre ten unha vertente que é histórica. A posta en marcha dun movemento que se inicia nos anos vinte do século pasado –documentado xa na década dos setenta– está cada vez mellar documentado e a liña que se suxire é unha liña de “liberación”, de loita contra o  heterosexismo. Dado que o heterosexismo segue vivo, o proxecto non pode considerarse esgotado. Con todo, opina Mira, esta liña de desenvolvemento tende a dar as costas a outros dous aspectos do que somos, ambos tamén suxeitos á historia e moi difíciles de fixar en termos de progreso.

Por unha banda, está o traballo sobre procesos de subxectivación. Por outra, de maneira máis delicada, a reflexión sobre o lugar do erótico na constitución do nós. Dado o carácter fluído do erótico e o emocional, a miúdo considerouse que non forman parte dun proxecto progresista. En realidade, asegura o activista convidado ao Respira!, as reservas son certas pois, como suxire Leo Bersani, hai terreos, centrais no “nós”, que non concordan cos fins do activismo.

O segundo aspecto sobre o que Mira se propón reflexionar é o impacto que tivo no “nós” a centralidade das redes sociais desde 2010: somos o mesmo? definímonos do mesmo xeito? Estas son algunas das cuestións que intentará contestar nun faladoiro que estará presentado por Alberto Fernández Peón.

---

 

Está todo listo para que mañá venres, día 18 de marzo, Moisés e Simón –os técnicos do Teatro Principal– levanten o pano do escenario e para que Baltasar Patiño nos sorprenda de novo cos seus horizontes lumínicos. Para que soe a sintonía do festival composta por David Graña e dea comezo a quinta edición do Alguén que respira!, o grande acontecemento poético do ano en Galicia. Serán catro dias cun programa engaiolante articulado, nesta ocasión, arredor do lema Corpos, disidencias, desexo. Entre eses corpos e disidencias que poderemos sentir ata o 21 de marzo –Día Mundial da Poesía– figuran Paula Luís, Elizabeth Duval, Teresa Moure, Miren Agur Meabe, Luís Antonio de Villena, Ana Romaní, Claudio Pato, Carlos Callón, Luís Muñoz, María Castrejón, Xavier Queipo, Andrea Nunes, Daniel Asorey,  María Callís Cabrera, Marga Tojo, Jesús Castro Yáñez, Miguel Anxo Fernán Vello, Antom Fortes ou Blanca Haddad, ademais de músicos cunha traxectoria tan poderosa como Rodrigo Cuevas ou Projecto Mourente.

Preparádevos porque comeza o programa máis irresistible que podades imaxinar sobre o debate identitario, coa poesía como elemento aglutinante e tamén con espazo para a reflexión da man de Alberto Mira, Brigitte Vasallo, Daniela Ferrández e Paulo Filgueiras, acompañados por Nee Barros, Alexandre Fernandez Peón e Sara Guerrero. Trátase, sen dúbida, dunha experiencia única no estado.

Toda a información e os detalles da programacion poderedes atopala na web alguenquerespira.gal. Para as entradas, a web de reserva é compostelacultura.gal

---

 

 

Tres presentadores de excepción para os faladoiros matutinos con café que celebra o Alguén que respira! polas mañás, a partir das doce. O primeiro dos cafés ten lugar o sábado día 19 con Alberto Mira como protagonista, unha das referencias imprescindibles dos estudos sobre a homosexualidade en España. O encargado de presentalo é Alexandre Fernandez Peón, responsable das redes sociais do festival e unha das figuras de maior personalidade dentro da poesía galega actual. Licenciado en Periodismo, Fernández Peón participou, entre outros proxectos, no volume Dentes para a mazá.

O domingo –día 20– é a quenda de Elizabeth Duval e Daniela Ferrández, que nos últimos anos se convirteron nas grandes pensadoras do feito trans en España e en Galicia. Para presentalas, o Respira! conta coa presenza de Nee Barros (Ourense, 2002), youtuber e escritor que reflexiona na súa obra sobre as opresións vencelladas ao xénero. En 2017 saiu do armario como persoa trans e froito dese proceso (“difícil “, asegura) é a súa peza teatral Identidade.

Xa no luns 21 –Día Mundial da Poesía–, o faladoiro xirará arredor das achegas de Brigitte Vasallo e Paulo Filgueiras, que fará un relatorio sobre a presenza da poesia homoerótica na literatura galega. Para facer a introdución ao acto contaremos coa prezenza de Sara Guerrero, unha das mais esixentes periodistas galegas de temas culturais que publica os seus traballos en El Salto.

---

 

O festival Alguén que respira! inaugúrase no Teatro Principal de Compostela o día 18 de marzo, ás oito da tarde, co tradicional recital no que conflúen distintas linguas ibéricas, este ano presentado co título Tres poetas para a eternidade. Sobre o escenario poderanse escoitar tres voces escintilantes das literaturas en vasco, catalán e galego: Miren Agur Meabe, recente Premio Nacional de Literatura, María Callís Cabrera e Ana Romaní. Un programa que nos conduce por tres poéticas consagradas nos últimos anos e nos abre as portas para o percorrido dos corpos en disidencia.

Para asistir á previa do festival Alguén que respira! pódense retirar as entradas desde o sábado día doce na web compostelacultura.gal ou no despacho de billetes da Zona C. Punto de Información Cultural de 11 a 14 e de 16 a 19 h. (teléfono 981 542 462). Tamén se poden retirar no despacho de billetes do Teatro Principal desde unha hora antes do comezo do recital (teléfono 981 571 026).

O 18 sairán as entradas para o resto da programación ata o 21 de marzo. Ese día 18 xa se poderán facer as reservas para as catro xornadas de programa. As canles de reserva son igualmente a web compostelacultura.gal, o despacho de billetes da Zona C e o propio Teatro Principal unha hora antes dos recitais.

Todas actividades teñen carácter gratuíto ata esgotar aforo!!!!

---

 

Alguén que respira!, o festival de poesía de Compostela, comeza o día 18 de marzo a súa quinta edición e para celebralo ensaiamos unha nova experiencia: artellar unha previa. Será no Teatro Principal, o domingo día 13, a partir das oito da tarde, cun programa extraordinario por múltiples razóns: Alejandro Palomas presenta a súa proposta La vida y una flor. Non é un espectáculo e tampouco un recital poético. É unha mestura de ambos nunha hora de intimidade cun escritor que percorre a alma humana desde a comuñón coa voz. Palomas trenza pezas e versos do seu último poemario –Una flor– con momentos claros e dolorosos da vida propia. É o tráxico e o cómico, o riso e mais o pranto. E é, sobre todo, o pracer de compartir unha hora de emoción e honestidade con quen chega ao fondo do humano desde a súa propia pequenez.

Continuar lendo “A previa do día 13: cando Alejandro Palomas fala de pé e a corazón aberto”

A diáspora coma experiencia queer é o título da intervención que preparou Brigitte Vasallo para o festival Alguén que respira!, que se celebra en Compostela entre o 13 e o 21 de marzo. Filla de emigrantes galegos en Barcelona, Vasallo é unha das participantes na sección de debates matutinos do festival, que se realizarán arredor dun café no ambigú do Teatro Principal, sede do respira!. A súa obra céntrase en investigar as formas de alteridade, con especial interese na dife-renza sexual e a construción nacional. Foi traducida a varios idiomas e dá clases como invitada en universidades que, como ela subliña, “non me aceptarían como alumna”.

Ademais de Vasallo, a sección contará cos testemuños de activista clave na investigación das identidades como Alberto Mira, Daniela Fernández, Paulo Filgueiras e Elizabeth Duval.

O festival, que se inicia o domingo día 13 cun recital de Alejandro Palomas, ofrecerá na súa quinta edición unha panorámica sobre a poesía e a reflexión dos corpos, as disidencias e o desexo, eixo central do programa. Serán cinco días de versos, reflexión e música –Rodrigo Cuevas é o encargado de “dar a nota” xunto a Projecto Mourente– cos que Compostela celebra o Día Mundial da Poesía.

---

 

Antón Reixa é o encargado de facer para o festival Alguén que respira! 2022 o manifesto do Día Mundial da Poesía. Reixa escribiu un texto de grande radicalidade onde xoga ironicamente con varios motivos: a realidade causal de que o Día da Poesía caia este ano en luns e o feito de alén da fama de sombrizos que teñen o luns, a culpa é da produtividade capitalista. Con anterioridade, o Manifesto do Día Mundial da Poesía foi escrito por María Xosé Queizán, Xosé Luís Méndez Ferrín, Luz Pozo Garza e Manuel Rivas.

Reixa (Vigo, 1957) leva axitando a poesía galega des que fundou en 1975 o grupo de Comunicación Poética Rompente, xunto a Alfonso Pexegueiro, Alberto Avendaño e Manuel M. Romón. A súa poderosa capacidade como creador e activista evoluciona rapidamente nos anos oitenta e noventa en proxectos como Os Resentidos ou Nación Reixa, que o converteron nunha das figuras máis carismáticas de galicia durante a cultura da transición. Sen abandonar nunca a escrita, con pezas dramáticas de gran repercusión e poemarios de culto, Reixa mergullouse no audiovisual e na incipiente indus- tria galega con series televisivas lendarias como Mareas vivas ou a produción cinemaográfica de O lapis do carpinteiro. Entre os seus libros, figuran As ladillas do travesti (1979), Historia do Rock and Roll (1985), Viva Galicia beibe (1994), MICHIGAN / ACASO MICHIGAN (2018) ou Outlet (2020). 

---

 

Alguén que respira!, o festival de poesía de Compostela, chega á quinta edición recuperando o seu modelo orixinal de catro xornadas consecutivas de programa, que se desenvolverán no Teatro Principal entre o 18 e o 21 de marzo, Día Mundial da Poesía. Ademais celebraremos unha sesión previa o  domingo 13 de marzo –a partir das oito da tarde– con Alejandro Palamos como figura central.

A maior novidade desta quinta edición é que o respira! xirará arredor dun lema vertebrador: Corpos, disidencias, desexo.  Baixo el, o programa reunirá en Compostela a boa parte das persoas que de maneira máis activa esculcaron na cuestión identitaria ao longo das últimas décadas. Sen dúbida, estamos ante unha oportunidade unica de escoitar voces e corpos de disidencia, desde Elizabeth Duval a Teresa Moure, pasando por Luís Antonio de Villena, Carlos Callón, Luís Muñoz, Alberto Mira, María Castrejón, Xavier Queipo, Andrea Nunes ou Daniel Asorey.

O festival inaugúrase, como é habitual, cun recital onde conflúen distintas linguas ibéricas. Será o día 18, venres, e sobre o escenario do Teatro Principal de Compostela escoitarase ao portugués António Barahona nunha das excepcionais ocasións en que recita en público, á catalana María Callís Cabrera, á galega Ana Romaní e á vasca Miren Agur Meabe, recente Premio Nacional de Literatura.

---

 

O festival Alguén que respira! non logrou esquivar a ameaza da covid. Este martes, a organización decidiu aprazar o seu recital de clausura despois de que un dos artistas do cartel, Rodrigo Cuevas, dese positivo por covid nun test realizado pouco antes de iniciar os ensaios no Teatro Principal de Compostela, sede do festival. Deste xeito, o que estaba convocado como un acto festivo para atravesar a noite máis longa do ano acabou sendo unha nova demostración de que a pandemia arrecia.

O festival Alguén que respira! organizouse nesta edición de 2021 en catro sesións ao longo do ano. O obxectivo era sortear as limitacións de aforo impostas pola covid pero finalmente a pandemia acabou por arrastrar o festival e fíxoo, ademais, na xornada de clausura, concibida como un acto festivo con dous creadores de marcado carácter lúdico: o galego Projecto Mourente e o asturiano Rodrigo Cuevas, este último considerado pola crítica especializada española unha das grandes revelacións do ano. Unhas horas antes de facer os ensaios, previstos para as 16,30 da tarde, Cuevas comezou a sentirse mal e un test de antíxenos confirmouno: era positivo por Covid. Nese momento, a dirección do festival, organizado polo Concello de Santiago coa colaboración da Secretaría Xeral de Política Lingüística, decidiu aprazar o recital.

Tanto o programa de Cuevas como o de Mourente están concibidos especialmente para o festival compostelán, que lles encargou a eles a proposta para atravesar xuntos a noite máis longa do ano. A oportunidade era única por múltiples razóns. O respira! celébrase habitualmente arredor do 21 de marzo –o Día Mundial da Poesía– e era excepcional este cambio entre o equinoccio de primavera e o solsticio de inverno. Pero tamén resultaba unha oportunidade única de ver a Rodrigo Cuevas nun formato infrecuente: o íntimo. A confluencia astral non o fará posible xa ata o próximo ano.

---

 

Desde as once da mañá deste martes 21 de decembro poderás retirar os teus convites para A poesía dá a nota, recital que pecha o programa no 2021 do Alguén que respira! Os convites están disponibles no despacho de billetes e mais na web do Concello de Santiago, compostelacultura.gal. Será un acto de vocación lúdica no que a poesía nos axudará a atravesar a noite máis longa do ano xunto a Rodrigo Cuevas e Projecto Mourente.

Serán dous programas concibidos especialmente para o festival compostelán, que lles encargou a eles esta insólita e luminosa proposta para atravesar xuntos a noite máis longa do ano. A oportunidade é única por múltiples razóns. O respira! celébrase habitualmente arredor do 21 de marzo –o Día Mundial da Poesía– e resulta case un xogo de prestidixitación este tránsito entre o equinoccio de primavera e o solsticio de inverno. E tamén será excepcional ver a Rodrigo Cuevas nun formato íntimo.

As entradas pódense reservar unicamente no mesmo día do recital. Están dispoñibles a partir das once da mañá na web compostelacultura.gal ou no despacho de billetes da Zona C, situado na Praza de Cervantes. Tamén se poden retirar no propio teatro desde unha hora antes do acto.

Continuar lendo “Unha oportunidade única e festiva para celebrar a poesía na noite máis longa”

Xa falta menos! Dentro dunhas horas –ás once da mañá do martes día 21– abriranse o despacho de billetes e mais a web do Concello de Santiago para que podados reservar as entradas de A poesía dá a nota, recital que pecha o programa de 2020 do Alguén que respira! Será un acto lúdico para celebrar a noite máis longa do ano no solsticio de inverno con Rodrigo Cuevas e Projecto Mourente.

As entradas pódense retirar unicamente o mesmo día do recital a partir das once da mañá na web compostelacultura.gal ou no despacho de billetes da Zona C, situado na Praza de Cervantes. Tamén se poden retirar no propio teatro desde unha hora antes do recital.

En A poesía dá a nota, unha producción promovida polo propio festival, confñúen as propostas de dous artistas que actualizaron –sen complexos– os códigos musicais de dúas culturas minorizadas: a asturiana e a galega. Mentres Rodrigo Cuevas propón a súa singular viaxe pola pouso popular do folclore astur, Projecto Mourente fixo unha serie de versións lounge e discotequeiras de poemas publicados por Lorena Souto, Ana Romaní, Francisco Cortegoso, Carlos Callón ou Lois Pereiro.

---

 

En primicia, ofrecémosvos dúas das pezas que Projecto Mourente interpretará o martes 21 de decembro no Teatro Principal de Compostela dentro do recital A poesía dá nota que organiza o festival Alguén que respira!. Trátase de días gravacións do ensaio que realizou o creador pontevedrés esta mesma semana con poemas de Ana Romaní e Lorena Souto.

Ana Romaní:

Lorena Souto:

---

 

A poesía de Ana Romaní, a de Francisco Cortegoso, Lorena Souto, Carlos Callón ou Lois Pereiro foron a inspiración do recital que este martes día 21 presenta no festival Alguén que respira! o heterodoxo Projecto Mourente [alcume baixo que traballa Carlos Valcárcel]. O recital, que comenzará ás 20,30 no Teatro Principal de Compostela e no que tamén participa Rodrigo Cuevas, é un encargo do propio festival que el desenvolve na fusión de ritmos e latitudes onde non faltan o beats discotequeiros e que lle dan sempre aos traballos de Mourente o seu particular selo. Carlos Valcárcel é profesor e investigador na Universidade de Vigo. Desenvolve a maior parte do seu labor na Facultade de Educación do campus de Pontevedra, onde ensina didáctica das linguas segundas e estranxeiras. Nos últimos anos, Valcárcel participou en proxectos de moi diverso tipo, desde a xeración automática de texto até a cooperación con Latinoamérica para fomentar o traballo colaborativo, pasando pola elaboración de diccionarios electrónicos multilingües.

Continuar lendo “Proxecto Mourente inspírase na poesía de Fran Cortegoso, Ana Romaní, Lois Pereiro, Lorena Souto e Carlos Callón”